SEJARAH SINGKAT HKI SIGUMPAR
I. Patujolo
Syaloom! Selamat Jubileum ma di hita saluhutna. Porlu hupabotohon hami tu hita saluhutna. Ia sejarah on di ginurithon St Pardomuan Hutasoit (Op.Popa Doli) rap dohot inang Sinta br Sihombing (Op Popa Boru) songon pelaku Sejarah na langsung dohot mengalami pardalanan ni HKI Sigumpar on. Di buat ma muse informasi dohot sian piga-piga natua-tua ni huria on nang sian angka pinompar ni angka Pendiri ni huria on. Dirajumi do ndang singkop sejarah on, asa molo adong nahurang lobi mansai las do roha nami manjalo masukan sian hita luhutna.
II. Bona ni pangkataion laho mamungka HKI
Di bulan Desember 1960, didok amanta Kepala kampung (KK) Gerhart (Op. Bunbunan) ma tu Gr Richart Hutasoit, Japidoli Hutasoit dohot Karal siregar: ” Ai boasa so marminggu hamu nangkaningan?” Gabe so diboto hamu be angka namasa, ia tu parjujian sai laho do. Hape aha ma ngolu sian i, so diingot hamu dakdanak mu nungnga lam ma godang. Molo holan angka inanata do tapasombu ndang toho be i. Hape molo marminggu iba lumbang do roha jala sonang pingkiran. Alai hatop do dialusi nasida KK? Marminggu do didok ho, nanggo baju niba pe so targanti” Gabe laos iba ma annon pabereng-berengon ni halak. Alai denggan do dialusi KK Gerhart nasida mandok; sasintongna ndang persoalan i, namarmingguon holan sahali do sungka, dungkon ni I lam tu tabona nama.
Alai didok nasima ma musengani tu KK Gerhart, toe ma buti sapala namarminggu tapajongjong ma Gareja naimbaru. Jala dos rohanasida laho pajongjong HKI.
Nang pe naung satahi nasida laho pajongjong huria i, alai marsipandohan ma nasida: “Olo jo ise ma anon na olo donganta di HKI ate?” Alai pintor adong do sian nasida muse mangalusi: didok ma : “toema Godang do dongan anon molo dung tapungka parmingguon i. Tadapothon ma angka namalas marminggu, ima taarahon donganta.
III. Di Pungka ma HKI
Jadi dos ma rohanasida laho mamungka HKI. Alai marsisungkunan ma muse nasida, didok ise ma manguluhon hita ate? Jadi didokkon nasida ma tu amanta Pardomuan Hutasoit (Op. Popa), ingkon saut nama mamungka HKI hita. Dialusima amanta pardomuan ma nasida: Unang jo pintor songoni, palan-palan jo, Alana ndang na mura mamungka Huria on. Alana borat doi, ai nungnga tung tangkas dipingkiri roha muna nuaeng i? . Dungi dialusi nasida ma; Nungnga be ate ninna nasida sama nasida. Jadi ninna si Pardomuan ma: Poso dope au. Alai didok nasida ma muse, ai ido asa pintor adong do jadi Vorhanger anon. Alai dialusi amang si Pardomuan ma muse: Imada hape masuk do ahu Hemende Koor, jadi tung mansai borat do rohangku maninggalhon HKBP on. So adong alana manang aha. Mamereng hamu pe lomos do rohangku, ai ahu pe dang adong na huboto, ala mansai poso dope ahu martimbangkon hamu. Ai behama holan parjuji do hamu ! Alai didok nasida ma muse : Pos ma roham amang, sapala naung hudok hami ingkon saut do. Mangasahon Tuhan i. Ihut dihamauliatehon masukan na sian amanta si Pardomuan i.
IV. Manggarap dongan Laho Mar-HKI
Antong molo songon I, dos ma rohanta, tudia ma hita laho? Ba didia ma nuaeng na godang angka na losok marminggu, ninna nasida ma. Antong tu Pea Hotang majolo hita, ala godang do dongan nalosok marminggu disi. Jadi borhat ma nasida tu si, dituju nasida ma tu jabu ni amanta Mangantar Sihombing, laos dijou ma tu jabui, amanta Jonatan Sihombing, amanta Valentin Siregar. Dung pungu nasida, disungkun ma nasida: “Apala aha do amang umbahen na ro hamu? Dialusima: “Imadah toho doi sungkun-sungkunmi, didok roha nami nian asa dos do rohanta laho mamungka sada Gareja, Didok Par Pea Hotang ma bah toho doi..? Ai ndang mungkin, Alana holan parjuji do hamu na ro on. Beha ma bahenonta mamungka Gareja. Tapingkiri majo boi do? Dialusi nasida ma: “ Asal dos ma rohanta. Didok par- pea hotang ma muse: “Antong molo songon i Gareja dia ma bahenonta” Dialusi ma nasida: “HKI ma nian didok roha nami ” Antong nga denggan i, songoni ma nasida marsipandohan.
V. Sangka Parmingguon Parjolo
Marsisungkunan ma muse nasida: Didia ma hita marminggu? Dapot nasida ma dos ni roha, di Pea hotang ma di pungka parmingguon I, di bagas ni amanta Mangantar Sihombing. Mardos ni tahi ma nasida paboahon tu inanta na be. Nian deba sian inata i, sanga do adong naso olo, siala didok rohana : Dia ma mungkin mamungka Gareja angka parjuji, angka so itanda ho Gareja, hape patagi-tagihon laho pajongjongkon. Alai didok angka amantai ma mangalusi: Tole ma tatorusma, ia dung marminggu hiota annon las do roha ni angka inata i
VI. Minggu Pertama.
Dipatupa ma parmingguon na parjolo tanggal 05-01-1961 di jabu ni amanta Mangantar Sihombing di Pea Hotang. Angka namarminggu disi :
· K K Gerhart Hutasoit.
· Mangantar Sihombing.
· Gr Richard Hutasoit.
· Japidoli Hutasoit.
· Karal Siregar.
· Jonatan Sihombing
· Valentin siregar
· Pardomuan Hutasoit.
Diminggu-minggu namangihut jalo do muse dohot amanta Anus Hutasoit.
Di namarminggi perdana i nasida, tung so diboto do songon dia pardalan ni acara diprmingguon i. Alana tung apala Agenda pe soadong, Bibel pe soadong; asa holan namarendei do nasida jala martangiang di nasahali i.
Dungi borhat ma amanta Pardomuan Hutasoit dohot mangantar Sihombing mandapothon Pdt. M Hutapea di Sibuntuon; paboahon naung dipungka nasida parmingguon di Pea Hotang – Sigumpar. Pintor las doroha ni Pandita i umbegesa ihut didok; nga denggan i mauliatema, sai dipargogoi Tuhanta ma hamu manguluhon hurianta i. Dungi ari Sabtu na i, laho ma amanta Pardomuan Hutasoit mangalap Agenda dohot Almanak dohot sude perlengkapan Parmingguon, asa adong pangkeon nasida. Di Minggu na paduahon, tong dope marsisungkunan nasida ise nalaho manguluhon minggu. Dos ma tahina dipangido ma amanta Pardomuan Hutasoit. Jadi Laos amantaon ma na mar-agenda dohot marjamita, amanta Mangantar Sihombing ma manjaha Ende. Nang pe songon i parmingguon, mansai semangat do nasida mamuji Tuhan i.
VII. Mandior Inganan Pargareajaan.
Ndang sadia leleng, pintor dilului nasida ma par-garejaan; alai mansai maol do dapot. Dung songon i ro ma amanta Japidoli Hutasoit mandok: ““Sapala di pargadongan nama an ma tabaen”. Satolop ma nasida, di baen ma di pargadongan i.
VIII. Sangkap Pauli Gareja.
Dung adong tano pargarejaan i, pintor direncanahon nasida ma laho paulihon Gareja disi paima adong tano na dumenggan. Margotong royong ma nasida laho padosdoshon, inganan i asa denggan. Molo hau ndang pola manuhor nasida, ala marsilean hau na be do. Adong na mangalehon, tiang, urur, nang hau hibul. Di mulai nasida ma padengganton pargarejaan i jadi pintor ro amanta si Parianus Siregar dohot si Kloster Siregar mangalehon hauna laho mambahen tiang. Ihut ma musengani laos masuk gabe ruas ni HKI. Mansai las maroha nasida mangjangkonsa.
Dungkon ni, dipatupa ma muse gorong-royong laho mambuat hadudu tu robean Pea-arung bahen tarup. Jala mansiboan balanjona be do disi. Songonima porsukna ditingki i parniahapan ni angka namamungka hurianta HKI Sigumpar on.
Ndang sadia leleng ro ma amanta St Henni Hutasoit laho mandokkon, asa dohot nasida gabe ruas ni HKI, jala pola dilehon nasida 3 tiang tu bangunan i. Dungkon ni, tamba ma mjuse amanta si Alpin Sihombing mangalehon hadudu dohot hau na boi urur sian porlak nasida, ihut dipangidohon asa masuk nasida gabe ruas ni HKI. Jadi tung las do roha nasida dipartamba ni ruas i. Ihutma antong angka nabaru masuk I dohot gotong royong di pature gareja i.
Dung haru singkop angka na ringkot tu bangunan i, jongjong ma gareja i. Dohot kondisi, tarup sian hadudu na hona tumtuman, ndang mardingding dope. Di situasi na songon I, talak bungbung dope alai nungnga dipatupa disi parmingguon.
Marnida hinaporsuk ni parmingguon I, didok amanta Gerhart ma tu ianakkonna: amanta Pardomuan Hutasoit, asa dilehon papan na laho mambahen tu parjabuanna hian bahen dingding ni gareja I, anggiat unang bungbung. Alai borat do roha nasida nian mangalehonsa, siala ndang adong dope jabuna.
Alai sai marhusori ma roha ni amanta Pardomuan Hutasoit dohot inanta boru hombing, gabe diputushon nasida ma mangalehon papan parjabuannai tu gareja, dibagasan pangkirimon: Sai napatupaon ni debata do muse lobi sian na ni lehon na i.
IX. Situasi ni dalan tu Gareja Pargadongan.
Boi ma antusanta situasi di pargadongan. Jadi asa molo laho marminggu nasida naujui, ingkon dibungka do sipatuna asa boi bolusan dalan, ala buntak do siboluson dohot aek . Alai songon ipe dihasabamhon do naadong i, nang pe tetap adong do pangkiriman lehonon ni Jahowa do muse inganan na dumenggan. Pangkirimon sisongon ima memotivasi nasida sai tongtong mangalului inganan nasing. Hurang lobi lima taon ma nasida marminggu di pargadongan i.
Alai di sada tingki, mangoli ma amanta Pangihutan Hutasoit. Didok nasida naeng gadisonna tanona asa adong laho tu pangolina. Dipabotohon ma i tu amanta St Henni Hutasoit.. Mardos ni roha ma nasida sude ruas naparjolo i, laho manuhor tano i. Saut ma di tuhor dohot arga Rp 5000,- di tanggal 08 agustus 1962. Basa do Tuhan i patuduhon tanoi tu nasida, ima na gabe inganan ni Gareja sisaonnari on.
Nang pe naung adong tanoi ndang dope pintor boi dibangun gareja. Tong dope diinganan pargadongan i. Hape tarupna pe nga mansai godang na boncor, asa molo ro udan nga maol be luluan inganan na so hona panetekan ni aek. Songon ipe tong do ditaon jala dihabengethon
X. Gareja di tano ni HKI
Mamereng kondisi ni Gareja naung lam memprihatinkan, dos ma rohanasida papinda gareja na di pargadongan i tu tano naung tinuhorna ima di inganan si saonari. Nang pe naung dipapinda, hinorhon ni pogos tong dope martarup hadudu gareja naimbaru i. Asa dang pola asing sian pangalahona sian na parjoloi; Ia ro udan sai tong dope nasida hona tiris-tiris na.
Dibagasan panggomgomion ni Jahowa Debata, dilehon do roha na benget nang hasabaraon tu sude ruas na parjolo i, Manahan do di sude namasa i, Baliksa lam dipelehon do dirina tu Debata marhite na olo gabe learning sintua ima amanta : Mangantar Sihombing, Gr Richard Hutasoit, Pardomuan Hutasoit dohot Japidoli Hutasoit. Dang pola sadia leleng hombar tu siatuasi ni Hurai tibu do nasida ditabalhon. Penabalan hatihai dipatupa di HKI Sijuguk. Dung sahat penabalan i, marlas niroha do luhutna Huria manjangkonsa, asa dipatupa ma partangiangan (syukuran) secara bersama di bagas ni amanta KK Gerhart Hutasoit.
Ala namartarup hadudu dope gareja i lam leleng lam tugodangna ma manirisi tu bagsan ia ro udan. Dos ma roha ni sude Ruas nang parhalado. Diganti nasida ma tarupi gabe sian butar. Tontu ndang na adong hian dope bahan nai. Dipatupa nasida ma muse gotong royong dohot ihut menyumbangkon parhau sian masing-masing jemaat dohot syarat ingkon hau ingol dohot hau res do asa boi dipatupa gabe tarup butar. Dung dipapungu hau i digargaji nasida mai secara bersama.
Sahat ma napinarsinta, tarup butar ma huria i, las situtu ma roha nasida. Alai ndang sadia leleng pintor ro ma udan hape tong boncor tarup i. Nungnga loja asa dapot nasio, hape tong do hape ingkon hona tiris ni udan. Asa sampe haruar do pandohan sian sahalak ruas ni huria i: “ Ah nga sala beon, tu lombang ma na roa”.
Alai nang pe songon i namasa, ndang gabe gale ruas nang parhalado i. Alai dibagasan semangat, lumobima dos ni roha namansai togu didok nasida do: “ Nang pe angka na pogos hita sandok ingkon guguanta nama asa martarup seng huria on, unang laos lea roha ni halak marnida hita.” Asa disepakati ma setiap keluarga mangalehon minimal dua lembar seng. Nionjar ni hapoprseaon nang las ni roha nasida adong do namangalehon 3 sampe 4 lembar per rumah tangga. Siani ma mulana martarup seng huria on .
XI. Lam Martamba do Pasu-pasu tu sude ruas
Mauliatema di Tuhanta, nang pe pogos-pogos angka ruas ta na parjolo i, dipatupa nasida do gogona asa boi jongjong bahkan maju huria i. Nang pe dipelehon gogo nang sibahenonna tu huria ndada lam marpogos nasida. Mauliate ma Di Tuhan i, baliksa lam denggan be do angka parngoluanna. Marhite ima ditahi nasida ma muse mambahen garejai sian Beton. Pintor dos do rohana nasida mangulahonsa, ndang adong namarungut-ungut. Margugube ma muse nasida patupahon i. Ndada na adong di patupa disi pesta pembangunan. Terbukti tupa do bangunan i marhite hamoraon ni Debata pinasahatna tu ruas ni HKI sigumpar on na ujui. Jadi do Beton huria i.
XII. Ndang marnasae Parungkilon i.
Songon pandok na peribahasa: “Sudah jatuh ketimpa tangga” Suang songon ima naniadopan ni angka pendiri ni HKI Sigumparon. Di situasi parmingguon namansai parir di tambai ma muse naingkon manjalo angka insak-insak dohot rehe-rehe sian angka nasomarlomo ni roha ni hajojongjong ni huria on. Pola do sahat tu na dipapulik sude ruas ni HKI sian sarikat parsahutaon. Asa hatihai gabe tubu do sarikat namargoar “Sarikat HKI “ namaranggotahon holan ruas ni HKI Sigumpar. Didok do ruas ni HKI ndang sidonganan: nanggo giring-giring na pe soada; diuduti muse dohot ejekan na trend hatiahai : HKI-HKO tusi lao tusi hao-hao.
Toe muse tung godang do angka hata-hata dohot insak-insak tu nasida, ala mamungka huria i, lumobi ma ala ‘inisiatorna’ angka parjuji. Didok do tu nasida: Apala so tinanda hamu sude”.
Ianakkon pe dohot do gabe mangae di hata nang pambahenan: Dipakoltuk-koltuk do di tingki haruar sahali ihut didok : HKI-HKO : Ulumon hao-hao, toe muse dung haruar Singkola : Di panabian dipandok ma muse songon i. Tung jut do roha nasida umbegesa.
Asa tung lungun do ditingki i di hilala nasida, pola do muse adong namangasupi tu amanta KK Gerhart di Lapo ni amanta Golead Hutasoit. Nian diampini amanta i do mandok: Padengganton do i muse, ai nungnga tamba Gareja di si Gumpar on, Jolma i pe anon lam ringgas do marminggu, ninna ma.
Tung nabalga do asiniroha ni Jahowa, dipargogoi do angka pamungka huria on, ndang olo sumurut nang pero angka tantangan nang rintangan na borat i. baliksa gabe lam marsitutu do nasida laho mangalanjuthon Pajongjong Gareja i.
Dipatupa ma bangunan sian beton, alai siala pogos olatni ring balok do na tolap dope. Pola do leleng songoni situasina, dibagasanna ma gareja na mardorpi papan i. Naso panagaman taon 1982, ro ma halisungsung (puting-beliung) hancur ma gareja nang bangunan na baru dipatupa i. Pola do sampe rata tu tano. Tumatangis ma angka ruas marrnidasa. Tepat ditingki i, adong do parhalado na borhat pataru Pdt. MAE Samosir tu P. siantar. Alai di parsorion na dokdok i, tung tarapul do roha huria I, siala pintor dihalaputi donganta sian HKBP Sigumpar do ro “Manghopol tondi” jala mamboan parbue pir tu huria HKI Sigumpar on. Tangkas do disi parsaoran na mansai dame laos ditangiangkon nasida do asa tung unang be masa sisongon i tu pudian ni arion. Gabe lam tu denggan na ma parsaoranta rap dohot donganta sian HKBP dungkon ni I tu joloan on. Tangkasma songon pandohan ni halak “HKI – HKBP ai so ise hita be” Sada do dibagasan Kristus i.
Dung so adong be gareja i, marpungu ma ruas nang parhalado jala disepakati ma patupa parmingguon di bagas ni amanta Bona Hutasoit.
Jalo do pintor dipatupa muse pajongjong gareja naimbaru; jala tetap do marhite gotong royong. Asa morot do saotik sian ingananna hian, ima gabe gareja si saonnari.
Bangunan ni gareja na dipatupa hatihai, ima gareja si sonari alai ndang adong dope palas-palas, dohot biluk parhobasan.
Ndang marnasae diadopi hurion parungkilon; di naung sonang marminggu sadia leleng alai di taon 1998 ro ma muse parungkilon; adong ma mangambat dalan tu garejaon marhite patupa parit di jolo ni gareja on, bahkan sude tano lapang on digodungi laho manuan kopi. Asa sungkot ma dalan tu gareja on. Dos ma roha ni sude ruas lumobi ma angka ina: Di loha ma parik i. Masa do paraloan tingki i. martangiang ma ruas ni HKI on ihut marende sian BE 272. Berkembang ma persoalan i; ndang holan HKI be namaralo tu na patupa pamarik i; alai gabe lungguk sigumpar on nama. Ujungna naung adong hian bangunan di patupa di tano lapang na dijolo gareja on dohot mai gabe di hancurhon. Alani paraloan i; dialuhon do ruas ni HKI on dohot masyarakat si gumpar tu Polisi jala di Sel do sampe saborngin (St Bangun Hutasoit, St Poltak Hutasoit sian HKI) dohot adong piga halak nai sian huta sigumpar.
XIII. Pangarimpuni.
Pinuji ma Tuhan Jesus Kristus ulu ni Huria i, na tongtong mamasumasu huhut mandongani hita sahat tu tingki naparpudion. Dipasahat do tu hita taon na imbaru 2011. Laos di taon on ma tanggal 05-01-1961 boho ma HKI sigumpar on dipasu-pasuhon Debata marumur 50 taon. ma di Tuhan Jesus Kristus, dipaojak huria HKI Sigumpar on 09 (sia) Kepala Keluarga do, hape saonari di Jubileum na pa 50 taonhon on nungnga sahat be 57 (lima puluh pitu) Kepala Keluarga. Naujui tung marpogos do sude, saonari ditumpahi Tuhani do hadumaon. Songoni ma songon sejarah singkat ni hurianta HKI Sigumpar na boi tarjahahon hami. Selamat berjubelaris ma di hita saluhutna.
.
Tidak ada komentar:
Posting Komentar